F1 電影｜全劇透唔實用高階彩蛋冷知識｜明錶生活

《F1》電影都上咗一個禮拜，經過星期六同日仲有七一假期，如果你仲未睇部電影，我相信你都唔會睇，如果你睇咗就當然我劇透啦，以下係《F1》電影一啲你唔需要知都睇得明嘅冷知識，當然你知道咗就會睇得更開心！
不過sorry！嗰啲邊個戴乜錶？邊個車隊領隊或者車手又喺電影裏面客串，張poster係向《阿基拉》致敬（老編係第一個spot到呢樣嘢嘅人），呢類太簡單嘅所謂彩蛋，呢篇文章唔會寫，如果你哋想知呢啲簡單嘢，就轉去隔籬台啦。

Text｜Anson Tang

冷知識1

憑住賽車主色為黃色及Camel贊助商，可以推斷90年代Sonny同老best Ruben係代表Lotus車隊出賽。

冷知識2

Sonny嘅人設亦係有根有據，1990年當年26歲嘅Martin Donnelly剛加盟Lotus車隊，卻在西班牙大獎賽排位賽期間意外地高速撞上防護牆，佢就好似戲中Sonny一樣，車身損毀、他也被彈出車外。多年之後，Martin喺2015年再次加入一隊英國職業車隊。

Martin Donnelly

冷知識3

Ruben嘅APXGP車隊總部其實係實景拍攝，地點就係位於英國、由知名建築師Norman Foster設計嘅麥拿侖車隊總部，呢度亦都係第一次作為電影拍攝場地（劇集反而有星戰系列《Andor》用過）。又因為係咁，所以電影入面老闆Ruben個位後面，有一部經典紅白麥拿侖賽車放喺度做display。

冷知識4

APXGP F1戰車嘅主顏色係黑色同金色，令人想起80年代Lotus車隊嘅主色，而下屆加入F1舞台的全新Cadillac車隊，都係以黑色為主。

冷知識5

Sonny加入APXGP車隊，車號用上幸運號碼「7」。呢個號碼之前係由有「Iceman」之稱嘅Kimi Räikkönen使用，佢喺2021年退休，今年呢個號碼轉咗去俾新秀Jack Doohan，不過Jack今年成績麻麻，出場之後已被車隊換走。

冷知識6

喺入面Sonny會喺比賽之前喺賽道上跑步同檢查賽道嘅「軚屎」。呢個行為叫track check，係幾十年前每個車手都會做嘅習慣，用意係令熟習一下賽道情況及彎位，而家很多車手如Max Verstappen都話明唔會咁做，因為已經有專業賽道分析師在開賽道用專業器材分析好晒⋯

冷知識7

又另外，電影去到意大利Monza賽車場，Sonny係一個有斜道嘅彎位跑步，呢個Monza Banking位置，50年代興建，長320米，傾斜角度介乎30與40度，喺F1賽事使用過四次分別係1955, 1956, 1960, 1961，亦喺1966年電影Grand Prix中出現過。

冷知識8

戲中50路嘅Sonny最終贏出一場F1賽事，F1歷史上年紀最大嘅分站冠軍為Luigi Fagioli當年佢以53歲零22日之高齡贏得1951年法國F1大獎賽事。而Louis Chiron係史上年紀最大嘅F1車手，1955年當時佢已55歲11個月之年齡，參加摩納哥F1大獎賽。

冷知識9

最後，如果Sonny活於現實中，究竟佢可唔可以中途參加F1比賽呢？其實要參加F1，你首先就要得到由FIA發出嘅super driver license，呢個超級駕駛執照需要一年renew一次，而且持有執照人士係需要持續有參加單座位職業比賽，所以正常一個人如果冇參加F1賽車30年，理論上佢應該已經冇咗呢個超級駕駛執照，不過戲中我哋見到Sonny有參加例如Le Mans 24小時耐力賽車等，所以雖然佢30年來冇出現過喺F1賽場，但佢仍然擁有super driver license都話唔埋…