曼聯今日友賽香港隊，繼續佢哋強勢嘅亞洲表演賽之旅，爭奪凝皓教育挑戰盃。作為足球界宇宙級勁旅，王者曼今屆表現優秀，成功保住英超位置，喺英格蘭760支球隊中排第15，又再一次勇奪歐霸亞軍，今晚就算多位正選球星去咗度假，或者抱住度假心情作賽，都必定予取予攜，坐亞望冠。如果你又係曼迷，又係錶迷，今晚著住波衫支持以外，不妨戴住以下嘅手錶入場支持王者！記得記得就算自己唔記得戴，都要提身邊朋友戴！
TAG Heuer Carrera Manchester United 特別版
望到令人肅然起敬嘅球隊徽號，印在9時位置，43毫米不鏽鋼錶殼，鏤通錶盤設計，搭載Heuer 02自動計時機芯，實用性強，如冇記錯，當時香港定價是港幣49,000，真係原來呢個花名出名到連瑞士都知，唔係講笑，十分攞景。
Hublot Big Bang Manchester United Red Devils 限量版
Hublot Loves Football！Football就係王者！這枚計時腕錶最有趣的地方，正是計時累計器可量度一般正常足球比賽半場時間的45分鐘，並設在中央，與時分及計時秒針同軸，可惜品牌忘記了其實王者每場比賽必定有費格遜時間，保時補到贏波為止，累計時間得45分鐘邊夠⋯
Tissot PRS 200 Michael Owen Edition
曼聯同個「7」字，簡直係聯成一體，因為隊內最「偉大」的球員或球隊隊長，如佐治貝斯、白賴仁笠臣、簡東拿、碧咸、丙朗等，都係著「7」號波衫，當中當然包括曼聯名宿，而天梭也曾幾何時也為曼聯名宿製作過特別版腕錶，仲好正確地在錶盤用紅色highlight咗個「7」字⋯
Breitling Chronomat 36 Victoria Beckham
最後躺着也中槍的，還有碧咸嫂維多利亞，作為歌手、時尚達人、品牌創辦人，維多利亞同碧咸，簡直係天仙配，羡煞旁人，碧咸長期為Tudor代言，碧咸嫂也跟Breitling聯乘，推出女裝系列Chronomat 36，直徑36毫米，除咗女粉絲之外，都好適合口氣大手腕細嘅曼聯男忠粉⋯
Trending Now
【紙本精選｜封面人物】周殷廷．直觀痛苦的時刻
2025-05-14
