Bell & Ross由2014至2017年，推出過一系列由前衛嘅機械裝置得到靈感設計而成嘅錶款，包括B-Rocket、AeroGT和Bellytanker，今年新出嘅BRV Racing Bird腕錶系列，亦都秉持同一理念，由Bell & Ross自製嘅一艘高速飛機BR-Bird演譯而成，藍色同橙色嘅元素都來自BR-Bird機身塗裝，三針款直徑38.5毫米，計時款直徑41毫米，均用鋼殼。三針款好抵玩，只需$18,500，計時鋼帶款都係$35,900。抵玩嘅款式仲有Vintage Steel Heritage系列，用返Bell & Ross經典嘅黑底米色字設計，配黑色陽極氧化鋁錶圈，三針款同計時款同樣係41毫米，三針款配橡膠帶$21,800，計時款配鋼帶係$36,100。
跟住要介紹嘅係舊年開始轉用方形錶殼嘅Diver系列，今年加推咗鋼殼藍面款同埋銅殼款，直徑42毫米，自動機芯，可以防水300米，銅殼配牛皮帶款$35,100。潛水款以外，為慶祝Bell & Ross連續第三年同Renault雷諾一級方程式車隊嘅合作，推出咗兩個R.S.18計時款式，包括限量999隻嘅BR 03-94 R.S.18，同埋限量250隻嘅BR-X1 R.S.18，前者配carbon fiber面，後者配鏤空錶面。最大特色在於個Microblasted鈦金屬錶殼，錶殼兩側部分偷空，營造一級方程賽車支架嘅感覺，亦令到腕錶輕咗。兩個都係自動款，BR 03-94 R.S.18價錢大約$49,900，而BR-X1 R.S.18就大約$165,000。
壓軸嘅係限量只有99隻嘅BR-X2 Tourbillon Micro Rotor，望落以為係藍寶石水晶錶殼款，其實佢基礎嘅錶殼都係鋼製，不過上下就三文治式咁樣夾咗兩層藍寶石水晶，遇上拋光嘅鋼殼，透明感同立體感好出眾，上手效果更加靚。錶殼直徑42.5毫米，用陀飛輪自動機芯，價錢大約係$645,000。